شو الإقتصاد السياسي وعلاقته بالمال والسلطة؟

الاقتصاد السياسي هو الوجه التاني للسياسة. يعني ما فيك تفصل المصاري عن القرار السياسي، ولا القرار عن المصالح الاقتصادية. كل وحدة بتأثّر بالتانية.

وبكلمة بسيطة، الاقتصاد السياسي بيبحث كيف بيتّخذ السياسيين قرارات بتأثّر بالاقتصاد، وكيف أصحاب النفوذ والمصالح بيستعملوا الاقتصاد ليقوّوا موقعهم السياسي.

مثلاً، وقت الدولة تقرّر ترفع الدعم أو تغيّر سعر الدولار، هيدي مش بس خطوة مالية، هيدي كمان قرار سياسي بيأثّر على الناس وعلى مختلف الطبقات وعلى الانتخابات كمان.

وإذا بدنا نحكي بواقعية لبنانية، الإقتصاد السياسي واضح كتير، لأنو من تشكيل الحكومات لتوزيع المشاريع والمناقصات، كل شي بيقطع بخيط المصالح الاقتصادية والسياسية مع بعض. يعني اللي بيمسك المال العام، بيمسك السياسة، والعكس صحيح.

بالتالي، الاقتصاد السياسي هو العدسة اللي بتخليك تفهم ليش القرارات الاقتصادية أوقات بتخدم فئة معيّنة وبتضرّ فئة تانية، وليش الإصلاح دايمًا بيتعطّل لما بيصطدم بالمصالح.

وبكلمة وحدة: الاقتصاد السياسي هو اللعبة الكبيرة بين المال والسلطة، والناس هني اللي بيدفعوا تمن الخسارة.